Фонд за млади умови

НАЦИОНАЛЕН КОНТЕКСТ

Република Северна Македонија се соочува со огромен губиток на човечки потенцијал и креативна енергија. Еден од најголемите фактори за ова е образовниот систем кој целосно не ги задоволува потребите на учениците. Во поглед на резултатите од учењето, ПИСА тестирањето во 2015 год покажа дека Северна Македонија е меѓу земјите кои остваруваат најслаби резултати и е рангирана втора од крајот од сите земји што учествуваа во истражувањето. Според ова истражување, на повеќе од половина ученици им недостасуваат основни компетенции. Уште поголема пришина за загриженост претставува фактот што резултатите одат во надолна линија, што е спротивно на позитивниот тренд кај останатите земји од регионот. Истовремено, Република Северна Македонија се соочува со интензивен одлив на мозоци.

Во глобални рамки, економијата која подлежи на брзи промени бара сѐ повеќе специјализирани и преносливи вештини, додека образовните системи се соочуваат со потешкотии да оддржат чекор. Повеќе не е доволно децата само да поминат низ училишниот систем. Како што растат, девојчињата и момчињата имаат потреба од образование чиишто резултати од учење имаат смисла, преку кое стекнуваат пошироки вештини, вредности, и искуства кои ќе им помогнат да развијат начин на размислување ориентиран кон раст и да ги подобрат нивните способности за иновативност, соработка, вработливост и граѓанско учество. Уште повеќе, во свет на масовна поврзаност, младите луѓе имаат потреба да бидат чуени, да бидат вклучени во процесите на развој креирани да ги подобрат нивните животи, и да имаат пристап до веродостојни ресурси и информации.

Во тој поглед, охрабрувачки појдовни точки на национално ниве се неколкуте младински програми во земјата кои имаат покажано позитивни резултати. Сепак, многу од нив се имплементираат на ниво на проект, што претставува предизвик во поглед на постигнување значително влијание кое би поттикнало структурни промени. Во поглед на нивната добросостојба, младите луѓе се соочуваат со системски пречки и оттука потребно е Владата, приватниот сектор, граѓанското општество, како и националните и меѓународните агенции да размислуваат стратешки за нивната иднина и да им помогнат да го остварат сопствениот потенцијал. Особено е важно да се идентификуваат проблемите и недостатоците во системот со цел да се делува и да се изнајдат решенија, но исто така, подеднакво е важно да се препознаат позитивните примери, најдобрите практики, и научените лекции. 

Со цел да се подобрат резултатите постигнати преку младинските програми, како што се „UpShift“, „Џуниор ачивмент“ и „Предизвик за млади истражувачи“, потребна е системска сеопфатна поддршка со која ќе се обезбеди конзистентност и одржливост на овие постојни програми.

Фондот за иновации и технолошки развој цели да ги соедини докажано најуспешните програми кои ја поттикнуваат креативноста, иновативноста, претприемништвото и вештините на 21виот век под една сеопфатна национална програма – „ФОНД ЗА МЛАДИ УМОВИ“, да го промовира и подржи нивното спроведување и на тој начин, да им овозможи на младите да напредуваат во светот на иднината.