Филипче нагласи дека државата Израел обезбеди тим од успешни и квалитетни обучувачи, кои ќе ги пренесат своите искуства за справување во кризни ситуации преку Хипер реалистичната програма за Израелската одбранбена армија. Предвидено е обуките континуирано да се спроведуваат, а учесниците да стекнуваат сертификат кој овозможува во иднина тие да бидат обучувачи на кадар кој делува при катастрофи.

Директорот на Фондот за иновации и технолошки развој, Јован Деспотовски истакна дека верува оти со оваа соработка реално може да се донесат иновативни методи и практики кои ќе се применуваат во Македонија.

„Мене ми е драго што веќе по три месеци од потпишувањето на меморандумот со државата Израел и Министерството за здравство имаме конкретна реализација. Фондот за иновации и технолошки развој во изминатиот период потпиша договори за соработка со над десетина домашни компани кои развиваат иновации во делот на биотехнологијата и медицината. Се работи за над еден милион евра кои државата ги вложува во развој на иновации во овој сектор. Не запираме тука, па така минатиот месец го објавивме и стартот на реализација на проектот за основање на Научно технолошкиот парк (НТП) во Скопје, каде еден од основите столбови ќе биде токму областа на биотехнологија и медицина. Заедно со Министерството за здравство и секако со странските партнери ќе продолжиме да вложуваме во развој на оваа област“, посочи Деспотовски.